Matthew 9
Iesu Sak Revi Meatin Tai Koa Usiven Mat a
1Iesu ka meatin keil onen uvut en vot ka amukoteh mari oai ten out Kaleli uva en taon kati onen ten out Kapaniam. 2Navong arokol taon, meatin oteta keil avou kakan meatin tai koa usiven mat mai ven Iesu, meatin enek mules matil en vulin. Navong Iesu lesi keke demkatien one mul, kei viteni min meatin koa usiven mat vit, “Natkuli, konametautei. Ahi roleletei mun vatisa enuk ven tisaen keil onom.”3Tei en tiser keil ten Mengkatien onen Mosis aro vesesal, ka navong alonge mukok aviteni min keil eris avit, “!Ei, meatin ekek mul selus kekar va kat Ahi! !Kei enga vit kur keihoen suval onen Ahi, veni Ahi enges kilea vakulat tisaen!”
4Ka Iesu kilea en asa amul amundemi. Sakini kei viteni min keil vit, “?Vensa mimul mivuli kat rendemien tatisa keil enek en tinomi? 5?Ven koa kave mae imok keke naviteni, 'Ahi roleletei mun vatisa enuk ven tisaen keil onom,' vuo, 'Kimea ka kikaka'? 6Ka vasakin kami miheilea keke Natin Meatin kur keihoen en out netan voumon methos vatal min Ahi ka meatin, miheles koanik ...” Ka Iesu viles les meatin koa usiven mat ka viteni mini vit, “!Kimea, kilum lat vulum, ka kiha ris teim som!” 7Hatte tas, meatin enek mea ka kaka va ris teim sen. 8Ka navong meatin keil alesi, amuti manin ka ametau, ka amasmas Ahi koa san vati keihoen enek min meatin tai keke kilea voumon sakien koanek.
Iesu Vise Matiu Vousili b
9Ka navong Iesu lokovein out enek ka mul mual va, kei les meatin tai mul rondan en titi eim toumien onen, isen Matiu. Kei mul lah takis ran Siu keil keke vasani suk min kavmen ten out Rom. Ka navong Iesu lesi, vise vit, “!Amai! !Kusil kat nau ka kimai kihi meatin tai onak!” Ka Matiu mea, lokovein umen onen, ka musil kat Iesu.10Matiu mulamun Iesu ka meatin keil onen uva en teim sen. Ka navong amul akanian, meatin houlu ten takis ka meatin sav keil koa atisa en meten Siu keil umai. Keil umai arondan ka akanian vituai ral min Iesu ka meatin keil onen. 11Navong Farasi keil alesi mukok, avis meatin keil onen Iesu avit, “?Vensa tiser onami mul kanian vituai ral min meatin keil ten takis ka meatin tatisa keil mukok?”
12Ka navong Iesu raengoni, kei viteni vit, “Meatin keil koa armesaitei arvatei avales dokta tai. Koakeil enges amesai uva avalesi. 13Ka kami, miheha ka mihehotin aneite ten selusien onen Ahi koanek koa mul en Tus Votut koa vit,
'Ekrovatei sanien votut keil enges onami,
ka ekvat imok keke emihemahis meatin sav keil.'(Hos 6:6)
Veni narmaitei mahise meatin keil koa avit moulien one mal tuai keke avahiles avousil nau. Vuo, numai keke mahise meatin keil koa alei kilea tisaen keil one keke avahiles avousil nau.”
Iesu Viteni keke Hihiseien Hau Keil Onen Sakras Vousil Kat Sakien Matu Keil Onen Siu Keil c
14Evus, meatin keil onen Sion Baptis umai ven Iesu ka avisi avit, “Avong houlu, komai ka Farasi keil meval ven anien ven hisien, ka melesi keke meatin keil onom armumontei sakien koanek. ?Vensa varei?”15Ka Iesu vit kesi min keil vit, “Navong meatin tai retalihe, meatin keil koa umai ven mari ale enek, asi keil veni. ?Mimundemi keke ilonge hetisa ka umon sakien ten tangien navong kei ro veah ral min keil? !Vuo, asakras! Ka avong tai mul mai koa meatin keil imai ka ikulat meatin enek ran keil. En avong enek varei, keil ilonge hetisa ka ihal ven anien.”
16Ka Iesu vit ris tatavolien tamun min keil vit, “Meatin tovuol vatili koe eisin koa heite matu vatal soke kaliko hau. Veni navong akasi, hatte koa heite hau mai sim kati ka hetal vas koa heite matu, ka hesakin eisin enek hemahoi suk hemarite mok.
17“Ka en vati sakien enek, meatin tovuol vatah uaen hau vaha en veite matu koa amumoni en hiliven sipsip veni kei keih tuai. Munak amumoni, uaen hau enek hetatahou ka hesipas veite enek. Hemukonek, hepurun veite enek ka uaen houele en atan. Sakini, meatin keil itah uaen hau heha en veite koa heite hau veni kei memerau veah, kilea vatatahou. Hesakini veite teni hetahos ka uaen koa mul ien emun hetahos.” ▼
Iesu Sak Revi Atouli koa Mat ka Ahin Tai koa Mesai e
18Navong Iesu mul selus veah usil tounah keil enek, hetetamen tai onen Siu keil mai veni, retengeiril va netan mini ka viteni vit, “Natukahin mat keitinek. Kimai li ka kiling hem eni, ka hemoul eris.” 19Sakini, Iesu mea ka kei ral min meatin keil onen amusil hetetamen enek.20Ka navong amul uva, ahin tai mai katau en Iesu ka rokol keieisin omon. Ahin enek, mesaien onen mama keil muasi sua teindan elu (12) ka reingeingeni vavus. 21Kei rokoli veni mundemi vit, “Vahit matokol keieisin omon enges, malonge vatahos.”
22Navong ahin enek rokol eisin omon, Iesu viles, lesi ka viteni mini vit, “Mama, konametautei. Ven demkatien onom, mesaien onom vus tuai.” Ka en hati avong enesek, aven ahin enek mai ris tahos.
23Evus, amual uva arokol teim sen hetetamen enek. Ka navong uva neim, Iesu les tali meatin tai apilei en souen keil tatangien, ka meatin houlu asien out ka amul amurang keih ven atouli enek. 24Ka Iesu viteni min keil vit, “!Alvaha! Titi atouli romattei, kei mules matil.” Ka meatin keil enek aviteai rohtoh en Iesu. 25Ka navong asila lat meatin keil vasi enek uva hae, Iesu va neim. Kei va ven atouli ka vuli kat hen. Ka atouli enek moul eris, mulei ka mea. 26Longlongien ten asa koa kur out ka vasi out enek.
Iesu Sak Revi Metovar Elu ka Ameng Tai
27Ka navong Iesu lokovein teim sen hetetamen koanek ka mul mual va, metovar elu lumai veni lumusili. Ka luvisohiso keih mini luvit, “!Natin asuv houlu Deved! !Emhemahis komal eli!”28Lumusili rokol avong koa Iesu va neim en eim tai. Ka navong uva neim, metovar elu lumai veni ka Iesu vis keilu vit, “?Mukave, milmundemi keke nakilea masak revi kamil?”
Ka luvit kesi luvit, “O asuv, melkul anatin eni.”
29Evus, Iesu mutelan hen rokol metealu ka viteni vit, “Nasak revi kamil veni demkatien onamil mul.” 30Ka metealu mai tahos ka lukilea luvalele. Ka Iesu meng kat keilu keih vit, “!Milnahitentei asa koa namumoni min kamil min meatin etai!” 31Ka navong keilu luva rani, lumang vas ongealu houlu ka longlongien usil tounah koa Iesu mumoni min keilu ka vasi out enek.
32Navong keilu luva hae, meatin oteta keil akur ameng tai mai ven Iesu. Meatin enek sakras vaselus veni ninin tisa tai mul ien. 33Ka navong Iesu vile lat ninin tisa enek va rani, meatin enek selus esuk. Navong vangi meatin keil alesi, amuti manin ka aviteni avit, “!Ei telmali, ir me-Isrel keil rorlestei veah etai tounah koa mukonek!”
34Ka Farasi keil avit, “Meatin ekek kur keihoen keke vahile lat ninin tisa keil ka ven Temat koa vi asuv onen ninin tisa keil.”
Iesu Enmahis Meatin Keil Ka Lesi Keke Meatin koa Avoum Vatal min Keil Arvinvintei
35Iesu mual rokol taon keil ka meteimal vasi keil en out enek. Navong mul va, kei vihisei en eim tahihiseien onen Siu keil, vitehiten more longlongien usil hiasuvien onen Ahi, ka sak revi meatin vasi keil koa akur mesaien savsav keil. 36Navong kei les marmari vangi meatin keil, tin vilelau en enmahisien ven keil, veni rendemien one langlango ka areingeingeni avalekat kataunien en out kave. Iesu les keil asuval sipsip keil koa meatin talosilkatien one tovuol. 37Sakini kei viteni min meatin keil onen vit, “Anien houlu mules en ah, ka meatin toumien keil arvinvintei keke avaha avasuhut eni. 38Sakini, mihehis min Asuv ten ah keke hesila meatin toumien hehi houlu mun iha isuhut en ah osen.”
Copyright information for
PMA